کور / مذهب / جنت وګټئ/دریمه برخه

جنت وګټئ/دریمه برخه

د خبریال ډاټ کام قدرمنو لوستونکو او پر دین میینو ! دا ځل مو وغوښتل چې څو مطالب په پرلپسې ډول شریک کړو ځکه د کتاب ډیره خوږ برخه به له خیره پر لیکه کیږي، او بیا به یې له لوستو ډیر خوندونه واخلئ11008406_1618576705023391_6916933594855131435_n

سپي ته اوبه ورکول:

(عَنْ أَبِي هُرَيْرَةَ، أَنَّ رَسُولَ اللهِ صَلَّى اللهُ عَلَيْهِ وَسَلَّمَ قَالَ: «بَيْنَمَا رَجُلٌ يَمْشِي بِطَرِيقٍ اشْتَدَّ عَلَيْهِ الْعَطَشُ، فَوَجَدَ بِئْرًا، فَنَزَلَ فِيهَا فَشَرِبَ، ثُمَّ خَرَجَ فَإِذَا كَلْبٌ يَلْهَثُ يَأْكُلُ الثَّرَى مِنَ الْعَطَشِ، فَقَالَ الرَّجُلُ لَقَدْ بَلَغَ هَذَا الْكَلْبَ مِنَ الْعَطَشِ مِثْلُ الَّذِي كَانَ بَلَغَ مِنِّي، فَنَزَلَ الْبِئْرَ فَمَلَأَ خُفَّهُ مَاءً، ثُمَّ أَمْسَكَهُ بِفِيهِ حَتَّى رَقِيَ فَسَقَى الْكَلْبَ فَشَكَرَ اللهُ لَهُ فَغَفَرَ لَهُ» قَالُوا: يَا رَسُولَ اللهِ وَإِنَّ لَنَا فِي هَذِهِ الْبَهَائِمِ لَأَجْرًا؟ فَقَالَ: «فِي كُلِّ كَبِدٍ رَطْبَةٍ أَجْرٌ»([1]))

ابي هريرة رضى الله تعالى عنه د حديث راوي دى، رسول الله صلى الله عليه وسلم ويلي: يو سړى په لاره روان و، چې ډېرې سختې تندې اخيستى و، د لارې په اوږدو کې يې يو کوهى وموند، کوهي ته ښکته شو او اوبه يې وڅښلې بيا له کوهي نه راپورته شو، ګوري چې يو سپى له ډېرې تندې څخه په لمدو خټو خوله لګوي، سړي په زړه کې وويل، دې سپي ته هم داسې تنده رسېدلې؛ لکه څنګه چې ماته رسېدلې وه، بيا کوهي ته ښکته شو او خپله موزه يې له اوبو ډکه کړه، په غاښونو کې يې کلکه ونيوله او راپورته شو، سپي ته يې اوبه ورکړې، الله تعالى د ده دا عمل خوښ او قبول کړ او ده لره يې بښنه وکړه.

صحابه کرامو وويل: يا رسول الله صلى الله عليه وسلم موږ ته د ځناورو په خدمت کې هم اجر شته.

رسول الله صلى الله عليه وسلم وويل: د هر ځناور په خدمت کې ثواب دى.

جنت وګټئ:

(عَنْ أَبِي هُرَيْرَةَ، رَسُولِ اللَّهِ صَلَّى اللَّهُ عَلَيْهِ وَسَلَّمَ فَسَمِعَ رَجُلًا يَقْرَأُ: قُلْ هُوَ اللَّهُ أَحَدٌ اللَّهُ الصَّمَدُ، فَقَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ: «وَجَبَتْ» . قُلْتُ: مَا وَجَبَتْ؟ قَالَ: «الجَنَّةُ»([2]))

ابي هريرة رضى الله تعالى عنه د حديث راوي دى، رسول الله صلى الله عليه وسلم له يو سړي څخه واورېدل، چې (قُلْ هُوَ اللَّهُ أَحَدٌ اللَّهُ الصَّمَدُ) يې وويل، رسول الله صلى الله عليه وسلم وويل: واجب شو.

ما وويل: څه واجب شو؟

رسول الله صلى الله عليه وسلم وويل: جنت.

انس رضى الله تعالى د حديث راوي دى، دى وايي: يو سړي رسول الله صلى الله عليه وسلم ته وويل:زه له دې سورة ((قُلْ هُوَ ٱللَّهُ أَحَدٌ﴿١﴾ٱللَّهُ ٱلصَّمَدُ﴿٢﴾لَمْ يَلِدْ وَلَمْ يُولَدْ﴿٣﴾وَلَمْ يَكُنْ لَّهُ كُفُواً أَحَدٌ﴿٤﴾ سورة الاخلاص).) سره مينه لرم.

رسول الله صلى الله عليه وسلم وويل: له دې سورة (قُلْ هُوَ ٱللَّهُ أَحَدٌ) مينه به تا جنت ته ننباسي([3]).

لس غلامان ازاد کړه، سل نېکۍ ترلاسه او له سلو بديو ځان وژغوره:

(عَنْ أَبِي هُرَيْرَةَ رَضِيَ اللَّهُ عَنْهُ، أَنَّ رَسُولَ اللَّهِ صَلَّى اللهُ عَلَيْهِ وَسَلَّمَ، قَالَ: " مَنْ قَالَ: لاَ إِلَهَ إِلَّا اللَّهُ، وَحْدَهُ لاَ شَرِيكَ لَهُ، لَهُ المُلْكُ وَلَهُ الحَمْدُ، وَهُوَ عَلَى كُلِّ شَيْءٍ قَدِيرٌ ([4]))

ابو هريرة رضى الله تعالى عنه د حديث راوي دى، رسول الله صلى الله عليه وسلم ويلي: څوک چې په ورځ کې سل ځلې دا کليمه ولولي، نو د لس عربي غلامانو د ازادولو ثواب يې وشو، سل نېکۍ به ورته وليکل شي، سل ګناهونه به يې وبښل شي، سل درجې به يې لوړې شي او تر بېګاه پورې به له شيطان نه ساتل شوى وي او د قيامت پر ورځ به له ده څخه د غوره عمل والا بل څوک نه وي؛ مګر هغه څوک چې له ده څخه يې دا عمل زيات ترسره کړى وي.

همداراز؛ چا چې ماښام وويله، نو هغه ته به دا انعامات ورکول کېږي. د بخاري او مسلم حديث کې ددې کليمې سل ځلې لوستل راغلي دي، دارنګې لس ځلې لوستل يې هم راغلي دي او ثوابونه يې له دې زيات دي.

د جنت درې تضمين ليکونه:

(عَنْ أَبِي أُمَامَةَ، قَالَ: قَالَ رَسُولُ اللَّهِ صَلَّى اللهُ عَلَيْهِ وَسَسلَّمَ: «أَنَا زَعِيمٌ بِبَيْتٍ فِي رَبَضِ الْجَنَّةِ لِمَنْ تَرَكَ الْمِرَاءَ وَإِنْ كَانَ مُحِقًّا، وَبِبَيْتٍ فِي وَسَطِ الْجَنَّةِ لِمَنْ تَرَكَ الْكَذِبَ وَإِنْ كَانَ مَازِحًا وَبِبَيْتٍ فِي أَعْلَى الْجَنَّةِ لِمَنْ حَسَّنَ خُلُقَهُ»([5]))

له ابو امامة رضى الله تعالى عنه څخه روايت دى، رسول الله صلى الله عليه وسلم ويلي: زه هغه چا لپاره د جنت په منځ کې د کور ضامن او ذمه وار يم، چې پر چا يې حق وي او بيا هم جګړه نه کوي.

د جنت په منځ کې هغه چا لپاره د جنت ضمانت ورکوم، چې د ټوکو ټکالو په توګه هم له دروغو څخه ځان ساتي او دروغ پرېږدي او د جنت په لوړه برخه کې هغه چا ته د کور ضمانت ورکوم، چې اخلاق يې ښه او ښکلى وي.

د جهادي لارې ګردونه او د جهنم لوګى؟:

(عَنْ أَبِي هُرَيْرَةَ قَالَ: قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ: «لَا يَلِجُ النَّارَ رَجُلٌ بَكَى مِنْ خَشْيَةِ اللَّهِ حَتَّى يَعُودَ اللَّبَنُ فِي الضَّرْعِ، وَلَا يَجْتَمِعُ غُبَارٌ فِي سَبِيلِ اللَّهِ وَدُخَانُ جَهَنَّمَ([6]))

له ابو هريرة رضى الله تعالى عنه څخه روايت دى، رسول الله صلى الله عليه وسلم ويلي: د هغه کس ننوتل جهنم (دوزخ) ته چې د  الله تعالى له وېرې يې ژړلي او اوښکې يې تويې کړې وي، داسې ناشونې ده، لکه څرنګه چې د شيدو ننوتل بېرته غولانځې ته ناشونې دي. او د الله تعالى په لار کې ګرد او د جهنم لوګي سره نه يوځاى کېږي.

دوه سترګې:

رسول الله صلى الله عليه وسلم ويلي: دوه سترګې داسې دي، چې د دوزخ اور به ورته ونه رسېږي، يوه هغه چې د الله تعالى له وېرې اوښکې وتويوي او بله هغه چې د شپې د الله تعالى په لار کې پيره کوي([7]).

دوه څاڅکي او دوه قدمونه:

رسول الله صلى الله عليه وسلم ويلي: الله تعالى ته له دوه څاڅکيو او دوه قدمونو څخه غوره او ګران بل څيز نشته.

لومړى څاڅکى، هغه چې د الله تعالى له وېرې له سترګو تويې شي.

دويم څاڅکى، هغه چې د مجاهد له سترګو نه د الله تعالى په لار کې تويې شي.

 لومړى قدم، هغه چې د الله تعالى په لار کې پورته کړاى شي.

دويم قدم، هغه چې د الله تعالى له فرايضو او احکامو څخه د يوې فريضې په ادا کولو کې پورته کړاى شي([8]).

په جنت کې ونې نيال کړئ:

(عَنْ جَابِرٍ، عَنِ النَّبِيِّ صَلَّى اللَّهُ عَلَيْهِ وَسَلَّمَ، قَالَ: " مَنْ قَالَ: سُبْحَانَ اللَّهِ العَظِيمِ وَبِحَمْدِهِ، غُرِسَتْ لَهُ نَخْلَةٌ فِي الجَنَّةِ([9]))

له جابر رضى الله تعالى عنه څخه روايت دى، رسول الله صلى الله عليه  وسلم ويلي: څوک چې يو ځل (سُبْحَانَ اللَّهِ العَظِيمِ وَبِحَمْدِهِ) ووايي، هغه لپاره په جنت کې د کجورې ونه نيالېږي يانې کېنول کېږي.

 

جومات ته تګ؛ که د جنت مېلمستيا:

(عَنْ أَبِي هُرَيْرَةَ، عَنِ النَّبِيِّ صَلَّى اللهُ عَلَيْهِ وَسَلَّمَ قَالَ: «مَنْ غَدَا إِلَى المَسْجِدِ وَرَاحَ، أَعَدَّ اللَّهُ لَهُ نُزُلَهُ مِنَ الجَنَّةِ كُلَّمَا غَدَا أَوْ رَاحَ»([10]))

ابي هريرة رضى الله تعالى عنه د حديث راوي دى، رسول الله صلى الله عليه وسلم ويلي: څوک چې سحر يا ماښام کې جومات ته ځي، الله تعالى هغه لپاره په جنت کې مېلمستيا تياروي، هر سحر او ماښام چې دوى جومات ته ځي.

د جنت خزانه:

(لاَ حَوْلَ وَلاَ قُوَّةَ إِلاَّ بِاللَّهِ([11])).

ژباړه: نشته دى ګرځېدل له ګناه نه او نه قوت د نېکۍ، مګر (د الله تعالى په توفيق).

ګټه:

رسول الله صلى الله عليه وسلم ابى موسى اشعرى رضى الله تعالى عنه ته ددې کليماتو ښودنه کړې وه او د جنت له خزانو څخه يې يوه خزانه نومولې وه، خزانه ورته ځکه وايي چې ددې ويونکى خپل ځان او خپل کارونه الله تعالى ته حواله کوي([12]).

 

 

په جنت کې يو کور او د لس لکو ګناهونو بښل:

(لاَ إِلَهَ إِلاَّ اللَّهُ وَحْدَهُ لا شَرِيكَ لَهُ، لَهُ الْمُلْكُ وَلَهُ الْحَمْدُ، يُحْيِي وَيُمِيتُ، وَهُوَ حَيٌّ لا يَمُوتُ، بِيَدِهِ الْخَيْرُ وَهُوَ عَلَى كُلِّ شَيْءٍ قَدِيرٌ([13]))

ژباړه: نشته لايق د بنده ګۍ پرته له الله نه، يو دى، شريک يې نشته، خاص هغه لره بادشاهي ده او هغه لره صفتونه د کمال دي  او هغه ژوندى دى، نه مري، په لاس د هغه کې خير دى او هغه په هر څه قدرت والا دى.

ګټه:

حديث کې راځي، چا چې دا دعا ولوستله، نو الله تعالى به هغه لره لس لکه نېکۍ وليکي، لس لکه ګناهونه به يې وبښل شي، لس لکه درجې به يې اوچتې شي او په جنت کې به ورته يو کور اباد کړاى شي.

نجات په څه کې دى؟:

(عَنْ عُقْبَةَ بْنِ عَامِرٍ، قَالَ: قُلْتُ: يَا رَسُولَ اللَّهِ مَا النَّجَاةُ؟ قَالَ: «امْلِكْ عَلَيْكَ لِسَانَكَ، وَلْيَسَعْكَ بَيْتُكَ، وَابْكِ عَلَى خَطِيئَتِكَ»([14]))

عقبه بن عامر رضى الله تعالى عنه وايي، له رسول الله صلى الله عليه وسلم څخه مې پوښتنه وکړه: نجات په څه کې دى؟

رسول الله صلى الله عليه وسلم وويل: د خپلې ژبې ساتنه وکړه، په خپل کور کې کېنه او پر خپلو ګناهونو ژاړه.

له مشرکې مور سره اړيکې ساتل:

اسماء بنت ابي بکر رضى الله تعالى عنها ويلي: د رسول الله صلى الله عليه وسلم په زمانه کې مې مشرکه مور څنګ ته راغله، ما له رسول الله صلى الله عليه وسلم څخه پوښتنه وکړه، چې مور مې مشرکه ده، ايا زه له خپلې مور سره خپلولي پاللى شم؟

رسول الله صلى الله عليه وسلم وويل: هوکى! خپلولي ورسره پاله!([15]).

له پورتني حديث نه د مور د قدر، درنښت او ارزښت ستر پيغام ترلاسه کېږي، دا په دې مانا چې د اسلام سپېڅلي دين کې د مور عزت، کرامت او شرافت ته په درناوي دومره پاملرنه شوې، که هغه مشرکه هم وي، ښايي اړيکې ورسره وساتل شي، د اسلام ستر لارښود محمد مصطفى صلى الله عليه وسلم د (حصرانه) مقام کې خپلې رضاعي مور ته د درناوي په نيت خپل مبارک څادر پر ځمکه غوړولى و، تر څو هغه پرې کېني، قرآن کريم هم په بېلابېلو سورتونو کې پر بچيو د مور شفقت او کړاوونه ويستل ياد کړي او بيا يې د مور او پلار سره ښۀ او اخلاقي سلوک ته اولادونه مامور او هڅولي دي.

 


[1] صحيح مسلم (4 / 1761).

 

[2] سنن الترمذي ت شاكر (5 / 168).

 

[3] صحيح اخرجه الترمذى، و احمد، والدارمي.

 

[4] صحيح البخاري (4 / 126).

 

[5] سنن أبي داود (4 / 253).

 

[6] سنن الترمذي ت شاكر (4 / 171).

 

[7] الشهيد.

 

[8] الشهيد.

 

[9] سنن الترمذي ت شاكر (5 / 511).

 

[10] صحيح البخاري (1 / 133).

 

[11]. مسند الشافعي ترتيب السندي – (0 / 204)

 

[12]. (نيل المرام فى ترجمة بلوغ المرام ٢ج-٤٦٠)

 

[13]. سنن الترمذي – (5 / 491)

 

[14] سنن الترمذي ت شاكر (4 / 605).

 

[15] الؤلؤ والمرجان ٣٠٨.

 

دا هم په زړه پوري مطلب دی

د صلاة التسبیح لمونځ/فاروقي

ګټه او یادونه: عبدالله بن عباس رضی الله عنه نه روایت دی، چې رسول الله صلی …

د ایمان په مجلسونو کې ګډون وکړئ/اوومه برخه

دا يو منلى حقيقت دى، چې د هر مجلس لپاره پر ناسو کسانو ځانګړى اغېز …